सुन्दर हरैचा नगरपालिका वडा नम्बर ४ ले गर्यो शैक्षिक सामग्री वितरण

आधारभूत विद्यालयहरूमा अध्ययनरत विद्यार्थीहरूको लागि शैक्षिक सामग्री र खेल सामग्री वितरण गरिएको छ। सुन्दर हरैचा नगरपालिका वडा नम्बर ४ को आयोजनामा वडाभित्र रहेका सरस्वती आधारभूत विद्यालय, जनचेतना आधारभूत विद्यालय, सृजनशील आधारभूत विद्यालय र आदर्श आधारभूत विद्यालय मा विद्यालयको मागबमोजिम आवश्यकताको आधार शैक्षिक सामग्री र खेल सामग्री वितरण गरिएको हो। शैक्षिक सामग्री वितरण कार्यक्रममा सुन्दर हरैचा नगरपालिकाका मेयर केदार प्रसाद गुरागाई, उपमेयर अकली देवी चौधरी वडा नम्बर ४ का वडाध्यक्ष कैलाशकुमार बस्नेत वडा सदस्य गणेश प्रसाद गुरागाई दुर्गा पौडेल लगायत जनप्रतिनिधि को उपस्थिति रहेको थियो। वडाभित्रका आधारभूत विद्यालयमा अध्ययनरत विद्यार्थीहरूको लागि आवश्यक शैक्षिक सामग्री उपलब्ध गराउने र शिक्षाको गुणस्तर अभिवृद्धिको लागि कार्यक्रम फलदायी हुने अपेक्षा रहेको जानकारी वडाध्यक्ष कैलाशकुमार बस्नेतले दिनुभयो। २०८१ साल फागुन ९ गते विद्यालय प्राङ्गणमा शैक्षिक सामग्रीसहित नगरपालिकाका मेयर उपमेयर लगायत जनप्रतिनिधिहरूलाई पाउँदा विद्यालयका ससाना नानीहरू हर्षित र उत्साहित देखिन्थे। सो अवसरमा सार्वजनिक विद्यालयको शैक्षिक गुणस्तरमा सुधार गरी सबै नागरिकका छोराछोरी सरकारी विद्यालयमा पढ्ने वातावरण बनाउन थप कार्यक्रम अगाडि बढाउने प्रतिबद्धता मेयर गुरागाईले व्यक्त गर्नुभयो।